Бестнет е едноставен и сигурен систем за дистрибуција на берзански информации, во реално време, преку интернет. Тој на корисниците им ги нуди достапните информации за вкупното тргување и движењето на цените на Македонската берза АД Скопје, без временско одлагање - "on line". Неговата употреба е едноставна и прилагодлива за сите корисници. Наменет е на акционерите, менаџерите, инвеститорите и на сите оние кои имаат потреба од брза, сигурна и веродостојна информација за случувањата на Македонската берза.
Преку Бестнет, берзанските активности можете да ги следите во деновите во кои се одвива тргувањето на Берзата (од понеделник до четврток), во реално време од 10:00 -12:00 часот. Најновите информации Бестнет ги аплицира моментално, со повторно избирање на соодветното мени од прегледот кој го користите. Доколку пристапите вон реалното време на тргување, Бестнет ќе ја прикаже состојбата од последното извршено тргување на Берзата.
Бестнет го проследува тргувањето преку три прегледи и тоа: Статистички преглед на тргувањето, Пазар по цени и Склучени трансакции.
Статистичкиот преглед на тргувањето ги дава збирните податоци за сите истргувани хартии од вредност, класифицирани според пазарите на кои се извршиле трансакциите (Официјален пазар, Неофицијален пазар и Други хартии од вредност - конвертибилни сертификати). Во овој преглед се имплементирани податоците за постигнатата максимална и минимална цена за одредена хартија од вредност, како и почетната и последната цена по која се нудат акциите и обврзниците и увид во номиналната цена на акциите на секое акционерско друштво. Овој преглед ги содржи и податоците за бројот на склучени трансакции за одредена хартија од вредност, количината на истргуваните акции/обврзници и остварениот промет (во денари) за секоја истргувана хартија од вредност. На крајот од прегледот се презентираат и збирните статистички податоци од сите пазари.
Прегледот Пазар по цени ги содржи количините и цените кои се нудат од куповната и продажната страна, увид во цената и количината на истргуваните хартии од вредност и просечната цена на истите. Во овој преглед се презентира и последната цена по која се склучила трансакција за дадена хартија од вредност и сите промени во цените искажани во апсолутни износи и проценти.
Во прегледот Склучени трансакции освен вообичаените показатели за склучените трансакции во текот на денот, назначени се и брокерските куќи, преку кои се одвивале истите и тоа за сите трансакции поеднинечно, како и идентификационен број под кој се регистрираат трансакциите на Берзата.
Напомена: Преку Бестнет не се дистрибуираат податоци кои се однесуваат на т.н. налози за тргување со специјални услови, како и за тргувањето со хартии од вредност во сопственост на државата преку т.н. аукциски модел.
За користење на информациите од Бестнет потребно Ви е корисничко име и
лозинка, кои ќе ги добиете откако ќе се претплатите. Се разбира неопходен е персонален компјутер и интернет врска.
Исполнете ги податоците од Договорот за претплата (пристапете до него преку полето означено со "Договор"). Исполнетиот Договор веднаш испратете го на e-mail: bestnet@mse.org.mk, или по пошта на адреса Македонска Берза АД Скопје, п.ф.852, за Бестнет, Скопје.
Извршете уплата на сметката наведена во Договорот. Вашето корисничко име и лозинката за пристап ќе ги добиете на Вашата e-mail адреса, најдоцна за 24 часа од денот на уплатата. Корисничкото време почнува да тече од денот на дистрибуирање на корисничкото име и лозинката до корисникот.
Пристапувањето на овој систем и неговото користење подлежи на долунаведените услови и одредби. Со пристапувањето на Бестнет и внесувањето на лозинката корисникот ги прифаќа истите. Сите информации достапни на Бестнет имаат информативен карактер и не смеат да бидат употребени во комерцијални цели, ниту да бидат дистрибуирани на трети лица без согласност на Македонската берза АД Скопје. Со ова корисникот истовремено се согласува дека нема да врши отстапување или препродажба на својата лозинка на други лица.
Македонската берза АД Скопје не сноси одговорност во ситуации на недостапност на Бестнет, предизвикани од виша сила, технички или
телекомуникациски пречки. Воедно, Македонската берза АД Скопје не сноси
одговорност за последиците од донесените одлуки по основ на податоците
дистрибуирани преку Бестнет.
Непридржувањето кон овие услови и одредби повлекува безусловен отказ на Договорот за користење на Бестнет, со тоа што Македонската берза АД Скопје го задржува правото да покрене постапка за надокнада на штета пред стварно надлежниот суд во Скопје.